Su cantu a tenore est una manera de fagher mùsica chi est pratigada in su tzentru de sa Sardigna. Est unu càntigu a bator boghes acordadas: bassu, contra, boghe e mesu boghe. Su chi distinghet su tenore dae totu sos àteros càntigos est chi bassu e contra (e in medas biddas fintzas sa mesu boghe) sunt boghes guturales, boghes chi essint dae gùturu (dae bula) in maneras diferentes e chi cantant nodas acordadas. Sa boghe pesat sa cantada e sos àteros cantadores li ponent in fatu impitende su gùturu comente un’istrumentu musicale e boghende sonos chene mutire paràulas (petzi in sos gosos e in càntigos pretzisos de carchi bidda sas àteras boghes ripitint sas paràulas cantadads dae sa boghe). Si narat cantare a tenore ca sa boghe est acumpanzada dae su tenore (bassu, contra e mesu boghe). Sa paràula tenore inditat totu su grupu de sos bator cantadores, totu su coru, ma fintzas sa chedda de sos tres chi acumpanzant cun boghes de bula. Tenore est una paràula sarda chi non cheret confusa cun cussa italiana “tenore” chi inditat unu cantadore ebbia. Cando in sardu faghimus su plurale de sos nùmenes annanghimus una “s” e tando “unu tenore” est unu grupu de bator pessones e “duos o tres tenores” sunt duos o tres grupos de cantadores. Su tenore est sa mùsica de sa poesia sarda ca est sa manera prus impreada de dare boghe a sas poesias in limba sarda e ca est s’acumpanzamentu de sas garas de poesia logudoresa (e, petzi cun bassu e contra, fintzas de cussa a mutetus de su Campidanu). Sa manera prus impreada pro cantare sas poesias est sa boghe ‘e note (o boghe sèria). Su tenore est una de sas maneras prus antigas, ma bia e presente fintzas oe, de acumpanzare sos ballos sardos: a boghe ‘e ballu. A tenore si cantant sos mutos, sa manera prus sarda de fàghere poesia e mùsica umpare: mutos a tenore. A tenore si cantant fintzas sos gosos de sos santos, de Nostra Sennora e de sa Chida Santa. Oe in die si cantat a tenore in prus de sessanta biddas e cada bidda at una moda sua de cantare. Sos tenores sunt formados petzi dae cantadores de sa matessi bidda e cantant petzi a sa moda de sa bidda issoro. Cantare a tenore cheret nàrrere a fàghere cada borta una cantada noa, ponende paris paràulas e mùsica e seberende comente lu fàghere. Est sa boghe chi cumandat ma iscurtende sos àteros cantadores adatat e mudat su cantare suo. Gai si diat poter assimizare su cantu a tenore a un’improvisatzione musicale ligada a s’interpretatzione de sa poesia.